Die Here sien wanneer jy sleg behandel word en Hy wil iets daaromtrent doen. Leer meer hieroor uit die verhale van Lea en Hagar.

Ek is besig met ‘n Bybelleesplan waar ek in 90 dae deur Genesis, Daniël en Romeine moet lees.

Die ander dag het ek gelees oor Jakob. Hy het sewe jaar gewerk om met Ragel te trou. Maar op sy troudag het Laban, sy skoonpa, hom bedrieg. In plaas daarvan om Ragel vir hom as vrou te gee, het hy haar suster, Lea, met Jakob laat trou.

Jakob is uiteindelik wel Ragel ook getroud, maar Lea het altyd geweet dat sy nie sy eerste keuse was nie. Sy het beslis geweet dat hy haar suster liewer gehad het as vir haar: “Jakob het ook met Ragel gemeenskap gehad. Hy het vir Ragel baie liewer gehad as vir Lea en nog sewe jaar by Laban gewerk” (Genesis 29:30).

Dit het nie ongesiens by God verbygegaan nie, want in die volgende vers lees ons: “Toe die Here sien dat Jakob nie vir Lea liefhet nie, het die Here vir haar kinders gegee, terwyl Ragel kinderloos gebly het” (vs.31).

HAGAR SE VERHAAL.

Hierdie vers het my aan ‘n ander verhaal laat dink.

In Genesis 16 lees ons dat Sarai die Here so ‘n bietjie probeer help het om Sy belofte, dat Hy vir hulle ‘n kind gaan gee, waar te maak. Sy gee haar slavin, Hagar, vir Abram as vrou. Hagar het swanger geword, en toe sy besef dat sy swanger is, het sy vir Sarai geminag. Soos jy kan dink, het dit vir Sarai ontstel. Sy begin toe om vir Hagar sleg te behandel. Dit raak naderhand so erg, dat Hagar besluit dis beter om liewer weg te loop.

Terwyl Hagar naby ‘n fontein in die woestyn was, kom die Here na haar toe. Hy vra haar waar sy vandaan kom en waarheen sy oppad is. Hagar verduidelik dat sy van haar eienares af wegloop. Dan sê die Here vir haar om terug te gaan na Sarai toe en om aan haar onderdanig te wees. Hy gee haar ook ‘n belofte oor die kind wat sy verwag.

Dan lees ons in vers 13: “Hagar het toe die Naam van die Here wat daar met haar gepraat het, aangeroep en gesê: ‘U is ‘n God wat my sien, hier het ek Hom gesien wat my gesien het.'”

Net soos met Lea het die Here gesien dat Hagar sleg behandel word. Wanneer sy wegloop kom Hy na haar toe om haar by te staan. Hy sê ook vir haar wat sy volgende moet doen.

GOD SIEN EN HY WEET.

Hierdie twee verhale leer ons iets wat ‘n baie bemoedigend kan wees vir iemand wat op een of ander manier sleg behandel word.

Die Here sien hoe jy behandel word en Hy gee om oor wat met jou gebeur.

Hy is ‘n God wat jou sien, wat sien wat aan jou gedoen word.

Hy is ook ‘n God wat na jou toe uitreik om jou in jou situasie te vertroos, om jou te help en jou te lei sodat jy weet wat om te doen.

Jou Here sal nie toelaat dat die manier waarop jy behandel word, sommer vir altyd aanhou nie. Nee, Hy sal ingryp en jou help.

Hy het dit vir Lea gedoen, deur haar met kinders te seën sodat haar man se liefde vir haar gegroei het. Kyk net na die name wat sy aan haar kinders gegee het en wat hulle beteken. Dis ook interessant dat Jakob vir sy seuns gesê het om hom by Lea te begrawe toe hy dood is!

God het dit ook vir Hagar gedoen – twee keer! (Genesis 16:1-15 en 21:8-21).

As jy op enige manier sleg behandel word, bring jou pyn na die Here toe. Hy weet daarvan, Hy gee om dat dit met jou gebeur, en Hy gee om vir jou.

Vertrou Hom om saam met jou in jou situasie te wees.

Vertrou Hom om jou daardeur en daaruit te lei.

Doen wat Hy vir jou sê om te doen, soos Hagar gedoen het wat Hy vir haar gesê het.

En vertrou Hom om in die hart van die persoon wat jou sleg behandel te werk, om hom of haar te verander.

Moenie moed opgee nie. God sien jou en alles wat aan jou gedoen word. En Hy gee om!