Wanneer jy die woord ‘danksegging’ hoor, waaraan dink jy? Meeste van ons dink dit beteken dis om dankie te sê, maar dis eintlik soveel meer as net dít. Danksegging is ‘n gesindheid in die hart van die mens, wat jou lewe nogal drasties kan verander. Dit versterk byvoorbeeld jou verhouding met God. Dit kan ook jou hart en gedagtes verander. En verder bring dit ook vir ‘n mens vreugde en vrede in jou lewe. So, kom ons kyk na danksegging en dit ons gebedslewe, en sommer ons lewe in die algemeen, kan verander.

WAT IS DANKSEGGING IN GEBED?

As jy in die H.A.T. kyk wat die woord ‘danksegging’ beteken, dan staan daar dis ‘n ‘uiting van dank’.

Maar wanneer ons die woord in ‘n geestelike konteks sit, dan is danksegging ‘n uitdrukking van dankbaarheid teenoor God. Dis wanneer ons dankbaar is vir wie Hy is, wat Hy al in die verlede vir ons gedoen het en ook steeds doen. Dis om God te erken as die Bron van alle goeie dinge (Jakobus 1:17).

En dis presies waarom Paulus ons in Filippense 4:6-7 daaraan herinner dat ons oor niks besorg moet wees nie, maar dat ons in alles met gebed en smeking, met danksegging, ons versoeke aan God ons Vader bekend moet maak.

Om ons versoeke met danksegging voor God te bring, beteken eenvoudig dat ons vir Hom dankie sê dat Hy dit wat ons van Hom gevra het, vir ons sal voorsien. Dit gaan dalk nie op die tyd of manier wees wat ons verkies nie, maar as dit wat ons vra Sy wil vir ons is, dan sal Hy dit gee. (God se Woord is Sy wil, so as ons enige iets volgens Sy Woord vra, vra ons volgens Sy wil.)

Die feit dat ons vir God dankie sê nog voor ons dit waarvoor ons gebid het, ontvang het, skep ‘n atmosfeer waarin ons Hom op ‘n dieper manier kan ervaar. En Hy belowe dat, as ons ons versoeke op dié manier na Hom toe bring, Sy vrede, wat alle verstand te bowe gaan, oor ons harte en gedagtes wag sal hou.

DANKSEGGING EN ONS VERHOUDING MET GOD.

Ek het netnou genoem dat danksegging ons verhouding met God versterk. Dit gebeur, onder andere, omdat ons erken dat ons alles wat ons het, uit Sy hand ontvang het. Dit herinner ons daaraan dat Hy ons Herder is, wat in alle opsigte vir ons sorg.

Danksegging help ons ook om die fokus van die probleme wat ons het, na God te skuif. Wanneer ‘n mens heeltyd op jou probleem fokus, word dit in jou gedagtes al hoe groter. En omdat dit vir jou al groter begin lyk, begin God vir jou al hoe kleiner lyk. Jy kan jouself selfs naderhand oortuig dat God eintlik nie veel aan jou probleem kan doen nie, want dit is heeltemal te groot.

Danksegging maak egter die probleem kleiner. Dit help jou om te onthou wat God voorheen vir jou gedoen het; hoe Hy voorheen probleme wat ook groot en onoorkombaar gelyk het, verander het. Dus bou dit jou geloof en vertrou in Hom. Dit herinner jou daaraan dat God die volle prentjie sien en presies weet hoe en wanneer om iets omtrent die probleem te doen.

En onthou, geloof is een van die hoofbestanddele wat nodig is in ons verhouding met God, so wanneer ons aan ons vertroue in Hom werk, werk ons ook aan ons verhouding met Hom.

DANKSEGGING EN ONS GEDAGTES EN HARTE.

Daar is al heelwat navorsing oor dankbaarheid en die invloed wat dit op ‘n mens het, gedoen. Sulke studies het al gewys dat dankbaarheid ‘n mens se angs en stres verminder en jou ‘n groter gevoel van welstand gee.

Wanneer ons dankbaar is teenoor God in ons gebede, verander dit die uitkyk wat ons op die lewe het. Dit help ons om minder negatief te wees en om ‘n meer positiewe uitkyk en benadering tot die lewe te hê.

Dit verander ook ons perspektief, omdat ons fokus op God se goedheid en getrouheid en nie op die probleme wat ons het nie. Dink maar aan Paulus en Silas wat, terwyl hulle in die tronk was, lofliedere tot God gesing het. Ons lees dat die ander gevangenes na hulle geluister het. Hierdie manne se lofliedere het dus nie net hulle eie gees versterk nie, maar ook die ander gevangenes, geïnspireer.

Dankbaarheid en danksegging teenoor God verander dus ons harte en hoe ons oor dinge in die lewe dink.

DIE VREDE EN VREUGDE VAN DANKSEGGING.

As jy vrede en vreugde in jou lewe nodig het, begin om vir God dankie te sê vir wie Hy is en wat Hy doen.

Aan die begin gaan jy dalk nie veel vreugde of vrede ervaar nie, maar moenie ophou nie. Hoe langer jy aanhou, hoe groter gaan jou vreugde en vrede word.

Dit gebeur weereens omdat dit jou oë afhaal van dit wat in jou lewe verkeerd is of verkeerd loop, en dit fokus op jou Hemelse Vader, vir wie alles moontlik is. En wanneer jou vreugde in Hóm is, maak dit nie saak wat om jou aangaan nie, want dis nie afhanklik van omstandighede nie.

‘N PAAR PRAKTIESE WENKE.

Daar is sommer ‘n hele klomp dinge wat jy kan doen om jouself te help om in die gewoonte te kom om gereeld vir God dankie te sê. Hier is ‘n paar idees:

1. Begin jou dag deur vir die Here dankie te sê vir wie Hy is. Dit sal jou herinner aan God se karaktereienskappe. Dit sal jou ook daaraan herinner dat die Een van wie al hierdie wonderlike dinge waar is, saam met jou deur jou dag stap.
   
2. Sluit jou aand af deur vir die Here dankie te sê vir wat Hy deur die dag vir jou gedoen het. Dit sal jou help om op te let na waar jy Hom deur die dag in jou lewe sien werk.
   
3. Begin ‘n dankbaarheidsjoernaal. Maak ‘n punt daarvan om gereeld dié dinge waarvoor jy dankbaar is, daarin te skryf. Dis ook ‘n goeie plek om antwoorde op jou gebede, neer te skryf. Blaai gereeld deur jou joernaal en sê vir die Here dankie vir die dinge wat jy neergeskryf het. Onthou, jy kan vir die Here bly dankie sê vir dinge wat Hy al jare terug vir jou gedoen het. Dit sal jou herinner aan God se getrouheid en dat Hy, wat Hy voorheen gedoen het, weer kan doen.
   
4. Paulus en Silas het die Here geloof ten spyte van hulle swaar omstandighede. Job het dieselfde gedoen. Die Bybel leer ons dan ook dat ons in alles dankbaar moet wees. Maak dus ‘n punt daarvan om te alle tye vir God dankie te sê vir wie Hy is en wat Hy doen. Skuif op dié manier jou fokus van jou omstandighede na die groot God wat jy dien.

OPSOMMING.

Danksegging verander die manier hoe ons bid, sodat ons fokus op God is en nie net op dit wat ons van Hom nodig het nie. Dit verander ook hoe ons die lewe sien en ervaar. Dit versterk ons verhouding met God en vul ons harte met vreugde en vrede.

Vandag wil ek jou dus uitdaag om elke dag ‘n punt daarvan te maak om vir die Here dankie te sê. Dit gaan nie net jou gebedslewe verander nie, maar sommer jou hele lewe!