My stiltetyd met die Here het oor die jare heen verander. Wat eers ‘n vaste roetine was wat ek getrou gevolg het, het later ‘n meer vloeiende, persoonlike ontmoeting met die Here geword. Dis vir my belangrik om ruimte te laat vir groei, leiding van die Heilige Gees en verandering in seisoene van my lewe. Ek wil vandag met jou deel hoe my roetine in 2021 gelyk het, en hoe dit nou lyk. Dalk help dit jou ook om jou eie stiltetyd te vorm of te verdiep.
HOE MY ROETINE IN 2021 GELYK HET.
In 2021 het ek my stiltetyd afgeskop met gebed. Ek het die Here gevra om met my te praat, my te leer en my hart voor Hom oopgemaak. Daarna het ek die vers van die dag op die YouVersion-app in my Bybel opgesoek en nie net die vers nie, maar die hele hoofstuk waarin dit staan, gelees.
Ek het die vers in my joernaal neergeskryf en ook neergeskryf wat ek voel die Here vir my sê – wat ek leer en wat ek moet onthou. Daarna het ek die daaglikse hoofstukke in my “The Daily Walk”-Bybel gelees. Dié Bybel neem jou deur die hele Bybel in een jaar se tyd. Party dae het ek egter dié stap uitgelaat en eerder ‘n geestelike artikel of boek gelees of ‘n geestelike video gekyk.
Ek het my tyd saam met die Here afgesluit soos ek begin het: in gebed.
HOE MY ROETINE NOU LYK.
Vandag lyk my stiltetyd anders, maar vir my het dit meer diepte en voel soos ‘n persoonlike ontmoeting met die Here. Ek begin steeds met gebed. Ek gesels sommer met die Here oor verskillende dinge in die lewe – dinge waaroor ek vrae het of waaroor ek bekommerd is of sommer net oor wat in my hart aangaan. Dan bid ek ook vir ander mense en bring die dinge op my gebedslys voor Hom. En laastens vra ek Hom om met my te praat deur Sy Woord en Gees, en om my te wys hoe ek Sy Woord moet verstaan en toepas.
Sommige dae gebruik ek weer die YouVersion-app. Ek is tans besig met twee leesplanne wat my help om die Bybel op ‘n volhoubare manier te lees.
Die eerste plan lei my om elke dag een hoofstuk te lees. Dit is ‘n plan wat my oor drie jaar deur die hele Bybel sal neem – stadig, maar betekenisvol.
Die tweede plan sluit ook ‘n hoofstuk per dag in, maar het daarmee saam ‘n kort oudio-episode (tussen 8 en 10 minute lank) wat die hoofstuk in meer detail verduidelik. Hierdie plan se naam is Through The Word – ek geniet dit baie!
Ek volg ook die Daily Refresh op die app – ‘n kort video en oordenking en ‘n gebed vir die dag.
DIE VOLG-STILTETYD-METODE.
Ander dae gebruik ek die VOLG-metode vir my stiltetyd. Dis ‘n eenvoudige en praktiese manier om in God se Woord in te delf. Dis hoe dit werk:
V: Vra Vir Leiding – vra die Here om jou oë en hart oop te maak vir wat Hy wil sê.
O: Ondersoek Die Teks – lees die gedeelte stadig en skryf dit woord vir woord in jou journaal. Skryf dan neer wat jy in die teks sien. Let op karakters, woorde, temas, patrone, ensovoorts.
L: Let Op Die Lesse – vra jouself af: Wat leer ek hier? Wat leer dit my oor God? Wat sê dit oor wat ek moet glo of oor hoe ek my lewe moet leef?
G: Gaan En Wees ‘n Doener – skryf neer hoe jy dit wat jy geleer het, in jou lewe kan toepas.
Ek is tans besig om Jesus deur die Evangelie van Markus te VOLG, en dit is vir my ‘n baie besondere ervaring.
Soos altyd, sluit ek my stiltetyd af met gebed. Ek sê vir die Here dankie vir die tyd saam met Hom, vir wat Hy my geleer het, en ek vra Hom om my te help om dit wat ek gehoor het, te gaan uitleef. Ek bid oor my dag, oor my werk, oor my woorde, my gesindheid – en vra Hom om my te lei.
HULP VIR JOU STILTETYD.
Ek deel hierdie roetine omdat ek weet hoe kosbaar dit is om elke dag stil te word voor die Here, sodat Sy Teenwoordigheid kan ervaar, Sy stem kan hoor en Sy Woord kan bestudeer.
My stiltetyd verander saam met my seisoen van lewe, maar een ding bly dieselfde: God is getrou om te praat wanneer ons by Sy voete kom sit.
As jy bietjie hulp nodig het met jou daaglikse stiltetyd, maak dan gerus ‘n draai in ons aanlyn-winkel en loer na die e-gids, By Jesus Se Voete.
En as jy graag ook die VOLG-stiltetyd-metode in jou stiltetyd wil gebuik, dan het ek goeie nuus.
Ek het ‘n gratis e-boekie, wat mooi die stappe van die VOLG-metode verduidelik. Jy kan dit gratis aflaai wanneer jy vir my weeklikse nuusbrief inteken.
Dis ideaal vir beginners, maar ook vir enigiemand wat graag met nuwe oë na hulle stiltetyd wil kyk.
Vul net jou inligting hieronder in en hou dan jou e-posbus dop vir die skakel na waar jy die e-boekie kan aflaai.
Baie seën vir jou en mag jy elke dag met vreugde en verwagting tot die Here Nader In Eenvoud!