Ons het Goddelike wysheid nodig wanneer ons planne maak vir die nuwe jaar, want ons kan God se leiding vertrou.

Ons lewens is vol planne – groot drome, klein doelwitte, en alles tussenin. Veral so aan die begin van ‘n nuwe jaar, word ons nog meer daaraan herinner. Tog weet ons dat selfs ‘n mens se beste planne nie regtig veel beteken sonder die leiding van Here se wysheid nie. Die Bybel leer ons dat ons nie net Sy wysheid nodig het om reg te beplan nie, maar ook om te weet hoe en wanneer om daardie planne uit te voer. Hierdie Bybelverse herinner ons aan die waarde van Goddelike wysheid. Dit herinner ons ook aan die belangrikheid daarvan om op Sy leiding te vertrou in elke aspek van ons lewens.

GOD SE WYSHEID.

SPREUKE 2:6.

Dit is die Here wat die wysheid gee, uit sy mond kom die kennis en die insig.

SPREUKE 4:5-9.

Sorg dat jy wysheid bekom, en insig! Moenie my woorde vergeet en daarvan afwyk nie; maak die wysheid jou metgesel, dit sal jou beskerm; as jy dit liefhet, sal dit jou veilig bewaar. Die wysheid kom eerste. Sorg dat jy wysheid bekom, gee alles wat jy het, om insig te kry! Slaan dit hoog aan, dan sal dit aan jou aansien gee. Dit sal jou ‘n man van betekenis maak as jy dit vasgryp. Dit sal jou lewe versier, dit sal vir jou ‘n sierlike kroon wees.

SPREUKE 3:5-8.

Vertrou volkome op die Here en moenie op jou eie insigte staatmaak nie. Ken Hom in alles wat jy doen en Hy sal jou die regte pad laat loop. Moenie dink jy het die wysheid in pag nie, dien die Here en vermy wat sleg is: dit is die geneesmiddel vir jou, die verkwikking vir jou liggaam.

SPREUKE 16:16.

Probeer liewer wysheid bekom as goud, liewer insig as silwer.

SPREUKE 19:8.

Wie homself liefhet, sorg dat hy wysheid verwerf; hy stel prys op insig sodat hy voorspoed kan geniet.

SPREUKE 5:1-2.

My seun, slaan ag op die wysheid wat ek jou leer, luister na my goeie raad. Dan sal jy self ook met oorleg kan optree en met die nodige kennis praat.

SPREUKE 8:11-12.

Ek, Wysheid, is kosbaarder as edelstene; wat jy ook al as baie werd beskou, teen my weeg dit nie op nie. Ek, Wysheid, het die verstand, ek het die kennis en die skranderheid.

SPREUKE 8:35-36.

Wie my [Wysheid] vind, vind die lewe self en geniet die guns van die Here. Maar wie my nie wil vind nie, doen homself skade aan; wie my haat, hou van die dood.

SPREUKE 9:10-12.

Wysheid begin met die dien van die Here; wie die Heilige ken, het werklik insig. As jy wysheid het, sal jy lank lewe, jou lewensjare sal vermeerder word. As jy wysheid het, het jy self die voordeel daarvan; as jy ‘n ligsinnige mens is, dra jy alleen die las.

JOU PLANNE.

SPREUKE 19:21.

Al maak mense hoeveel planne, wat die Here besluit, staan vas.

SPREUKE 15:22.

Waar daar nie beraadslaging is nie, slaag planne nie; dit slaag wanneer daar baie raadgewers is.

SPREUKE 16:3.

Laat wat jy doen, aan die Here oor, dan sal jou voornemens geluk.

SPREUKE 21:5.

Wat hardwerkende mense beplan, is nuttig, maar elkeen wat oorhaastig is, stuur af op gebrek.

PSALM 20:5.

Mag Hy u gee wat u hart begeer en al u voornemens laat geluk.

LUKAS 14:28-30.

Wie van julle wat ‘n gebou wil oprig, gaan nie eers sit en die koste bereken, om te sien of hy genoeg geld het om die werk te voltooi nie? Anders, as hy die fondament gelê het en nie in staat is om die gebou te voltooi nie, sal almal wat dit sien, met hom die spot begin dryf. Hulle sal sê: ‘Hier is ‘n man wat begin bou het maar nie kon klaar maak nie.'”

SPREUKE 16:9.

‘n Mens beplan sy pad, maar die Here bepaal hoe hy loop.

ROMEINE 8:28.

Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is.

My gebed is dat hierdie verse jou inspireer om, voor jy vir 2025 planne maak en doelwitte stel, stil te word by die Here. Vertrou Hom om vir jou wysheid te gee. Vertrou Hom dat Sy tydsberekening altyd reg is en dat Hy jou sal lei sodat jy die regte pad volg. Met Sy wysheid en leiding kan jou planne nie anders as om betekenis en seën vir jou, en almal om jou, te bring nie.