As jy vir jou kind vra waarom ons Kersfees vier, wat sou sy antwoord wees?

Vir party beteken dit net een ding – geskenke. Ander sal dalk praat oor die kersboom en -versierings en al die lekker eetgoed. En jy sal dalk selfs ‘n kind kry wat dink Kersfees gaan oor die kuier saam met Ouma en Oupa en al die nefies en niggies.

Al hierdie dinge is so deel van Kersfees, dat ‘n mens eintlik nie die kinders kan kwalik neem as dít is waarop hulle fokus nie.

En dis juis waarom dit belangrik is vir ouers, en grootouers, om seker te maak die kinders weet regtig waarom ons Kersfees vier. Die volgende paar weke voor Kersfees is die ideale tyd om met jou kind daaroor te praat.

Hier is ‘n paar idees wat jy kan gebruik om dit te doen.

JESUS SE GEBOORTE.

Maak ‘n punt daarvan om in die weke voor Kersfees die gedeeltes in die Bybel te lees, wat verband hou met Jesus se geboorte.

Begin byvoorbeeld by die profesieë daaroor. Lees ook hoe elkeen van dié profesieë deur Jesus vervul is. (Dis ook ‘n goeie tyd om jou kind daarop te wys dat God altyd die beloftes wat Hy maak, nakom!)

DIE VERLOSSINSVERHAAL.

Dis nie net die geboorte van Jesus wat belangrik is nie. Die res van Sy lewe, en veral Sy dood en opstanding, is net so belangrik.

Vertel dus ook vir jou kinders waarom Jesus aarde toe gekom het. Die Kersverhaal maak baie meer sin as ‘n mens weet waarom dit gebeur het.

Begin by Genesis, sodat hulle kan verstaan waar sonde in die wêreld vandaan gekom het.

Kyk na verskillende plekke waar God belowe het om vir ons ‘n Verlosser te stuur.

Gesels ook oor Jesus se kruisdood en opstanding en wat dit vir ons as gelowiges beteken.

KYK ‘N FLIEK OOR JESUS SE GEBOORTE.

Nog ‘n idee is om ‘n fliek oor Jesus se geboorte te kyk.

Jy sal dalk net eers self na die fliek moet kyk, om seker te maak dit is Bybelskorrek voor jy dit vir jou kinders wys.

Onthou ook om na die tyd te gesels oor wat gebeur het en wat die kinders daaruit geleer het.

LEES ‘N BOEK OOR JESUS SE GEBOORTE.

‘n Mens hoef nie net die Bybel te lees om oor Jesus se geboorte te lees nie. Daar is ook kinderboeke daaroor beskikbaar wat jy saam met jou kinders kan lees.

Hierdie een, wat by CUM-boeke beskikbaar is, is ‘n goeie idee: Die Aksie-Bybel Jesus Se Geboorte: 25 Bybelstories Oor Hoekom Jesus Aarde Toe Gekom Het.

Gebruik die verhaal wat julle lees om vir jou kind te verduidelik waarom ons Kersfees vier.

WOON ADVENT-EREDIENSTE BY.

Advent is die weke voor Kersfees. By meeste eredienste word daar dan ook in dié tyd in die preke gefokus op die koms van Jesus.

Maak dus ‘n punt daarvan om soveel as moontlik van die Adventsdienste by te woon.

Gesels na elke diens met jou kinders oor die preek en wat hulle daaruit geleer het.

As jou kinders nog te klein is om die preke te verstaan, kan jy vir hulle die les uit elke preek in eenvoudige taal verduidelik.

REIK UIT NA ANDERE.

Jesus het, toe Hy gebore is, geskenke gekry by die sterrekykers uit die Ooste. Dis dan ook waarom ons tydens Kerstyd vir mekaar geskenke gee.

Maar al is dit die algemene rede vir geskenke gee, is daar nog ‘n groter en belangriker een.

Jesus is die grootste geskenk wat nog ooit gegee is.

God die Vader het geweet ons kan onsself nie red nie en daarom het Hy Sy eie Seun gegee om ons van sonde en die dood te verlos.

Gebruik dus Kerstyd om jou kinders te leer dat God die Gewer van goeie gawes is en dat ons Sy voorbeeld moet volg.

Julle kan dit doen deur vir andere, wat nie geskenke kan bekostig nie, geskenke te gee.

Of nooi iemand, wat tydens Kersfees alleen is, uit vir kersete.

Julle kan selfs kospakkies opmaak en dit die dag voor Kersfees uitdeel aan mense wat op straat bly.

Of julle kan uithelp by die plaaslike sopkombuis en só iemand anders se dag opvrolik.

DIT GAAN OOR JESUS.

In Engels sê mense: Jesus is the reason for the season.

Dis belangrik dat kinders dit weet, sodat hulle verstaan presies waaroor Kersfees gaan.

Gebruik die ses idees hierbo, of soek nog ander wat interessant klink, en leer jou kinders hierdie Kerstyd waarom ons Kersfees vier!